fbpx



O departamento de Servizos Sociais pechou o exercicio de 2021 cun investimento de preto de 90.000 euros para o Fondo de Emerxencia Social. Tal e como lembra a concelleira responsable desta área, a socialista Rosa Fernández, é a través desta liña coa que se lle presta auxilio e axudas básicas a aquelas familias que non contan con recursos económicos, atopándose en risco de exclusión. Este investimento supuxo un incremento de preto do 30% con respecto á partida de 2020, que se pechou en algo máis de 65.000 euros.



O 30 de novembro de 1972 o núcleo de Combarro era declarado oficialmente como Conxunto Histórico. Agora, medio século despois desta histórica data, o Concello de Poio está traballando na posta en marcha de diferentes iniciativas para continuar mellorando, poñendo en valor e dando a coñecer un dos enclaves de referencia do municipio, tanto a nivel de historia e tradición como desde o punto de vista de atractivo turístico.



As obras de mellora de servizos e reforzo da seguridade viaria e peonil que se están levando a cabo en Monte Covelo, entre as parroquias de Samieira e Combarro, avanzan a bo ritmo. Se non se producen incidencias, a actuación podería estar lista de cara ao vindeiro mes de febreiro, tal e como sinalou a tenente de alcalde e responsable da área de Obras e Servizos Municipais, Chelo Besada, logo de visitar esta semana os traballos. A edil do Goberno local estivo acompañado polo responsable de Urbanismo, Gregorio Agís.

Por segundo ano consecutivo, Poio vivirá un Entroido diferente. A concelleira de Cultura, Raquel Rodríguez (BNG), mantivo este xoves unha reunión con representantes de grupos de animación, comparsas e colectivos culturais locais, na que se decidiu cancelar as grandes citas do Entroido. Tanto a edil do Goberno local como os e as integrantes das agrupacións coincidiron á hora de tomar esta decisión, que vén provocada pola situación sanitaria e polo feito de que as comparsas da contorna e os grupos de animación este ano xa anunciaran no seu día que descartaban preparar espectáculos. “É unha decisión totalmente comprensible, dado que o contexto non é o axeitado para que os membros dos colectivos se xunten para elaborar os seus disfraces ou realizar ensaios”, indicou Rodríguez Alonso, que amosou o seu agradecemento ao tecido social por acudir á reunión e pola súa predisposición á hora de “ir todos e todas da man”.


O Pleno da Corporación abordará na súa vindeira sesión ordinaria, o martes 25 de xaneiro (19.30 horas), unha proposta impulsada desde a Concellería de Seguridade Cidadá para solicitar a Portos unha concesión demanial de varias parcelas situadas no Paseo das Redeiras de Combarro, a fin de acometer unha serie de actuacións que permitirán dotar a esta zona dunhas 80 prazas de estacionamento de xestión municipal para residente.