O Concello de Poio incluirá na sesión ordinaria do pleno de setembro, que se realizará o próximo martes, o acordo para iniciar os trámites necesarios para crear un ente supramunicipal de xestión de auga e dotar dunha regularidade administrativa coa que garantir a igualdade das condicións nas que se presta o abastecemento de auga á poboación de Poio, Pontevedra, Marín, Bueu, Sanxenxo, Vilaboa e Ponte Caldelas. A creación deste organismo asegurará a cogobernanza de todos os concellos, para autorizar e fixar as condicións das captacións dos ríos Lérez e Rons, de onde se abastecen estes concellos. Ademais, segundo explica o alcalde, Ángel Moldes, é un dos compromisos adquiridos polos concellos con Augas de Galicia nas últimas reunións celebradas en xullo.
O edil de Festexos do Concello de Poio, Fran da Silva, deu a coñecer esta mañá a programación completa da Festa na Honra á Virxe da Merced, que se celebra esta fin de semana, entre o sábado 23 e o domingo 24, en colaboración con Fraternidad Seglar Mercedaria Orden III, e que ademais dos actos relixiosos, tamén inclúe actuacións musicais e outras actividades, así como o espectáculo da orquestra París de Noia.
O novo Goberno de Poio dá os primeiros pasos para converter a antiga gardería de Campelo nun Centro de Día. O alcalde Ángel Moldes recorda que é un compromiso adquirido cos veciños, e por iso urxe comprar o local e a finca para evitar que o edificio siga deteriorándose e perder a oportunidade que supón utilizar unha instalación xa existente e tan ben ubicada para prestar este servizo necesario e demandado polos maiores de Poio e polos seus familiares. Este Centro de Día na antiga gardería de Campelo permitirá que ninguén teña que abandonar o seu fogar nin distanciarse dos seus seres queridos porque van recibir a atención ao carón das súas casas.
O Concello de Poio inicia os trámites para que a Festa da Ameixa sexa declarada de interese turístico de Galicia. O alcalde Ángel Moldes subliña que é unha das festas máis emblemáticas do concello e tamén a máis antiga, e que cumpre cos requisitos para alcanzar esta distinción. Por iso, avanza que xa están comezando a recompilar e preparar toda a documentación esixida para conseguir este recoñecemento. Con respecto ao balance da celebración esta fin de semana, a Festa da Ameixa de Campelo esgotou existencias, e nin as chuvias do domingo frearon a chegada de comensais para degustar o produto. En total, repartíronse 1.332 racións, das que 856 corresponderon a ameixas á mariñeira, a preferida dos asistentes, fronte a 298 racións de fideos con ameixa e 178 de arroz con ameixas.
A Festa da Ameixa de Campelo inaugurouse esta tarde cunha homenaxe á xente do mar, na que se fixo entrega da Ameixa de Prata do Concello de Poio ás mariscadoras que se xubilaron no último ano e se recoñeceu a labor de Rosa Quintana durante os últimos anos en prol do sector. Un acto que contou coa asistencia do alcalde, Ángel Moldes, do conselleiro do Mar, Alfonso Villares, e dos deputados provinciais, María Ramallo e Marcos Guisasola, así como doutros membros da corporación municipal, representantes das confrarías e das agrupacións de marisqueo, de asociacións culturais, veciñais e deportivas de Campelo e das empresas do sector.
Poio está en continua transformación e crecemento. O noso municipio medra e o Concello de Poio, que sempre apostou e segue apostando pola posta en valor da nosa historia e das nosas tradicións, modernízase para adaptarse ós novos tempos e optimizar os nosos recursos. Poio é xa un lugar de referencia consolidado na xeografía mundial, e agora, grazas ás novas tecnoloxías, temos tamén o noso sitio neste espazo virtual, universal e participativo que é a Rede. Estamos agora máis cerca de todos, dos que vivimos aquí e dos que se atopan lonxe.