Boa acollida no inicio do festival infantil Chalaniña que comezou este mércores en Lourido, organizado polo Concello de Poio e no que os asistentes puideron gozar nesta primeira sesión da actuación do Mago Noel. O festival, gratuíto e destinado ao público familiar, continúa esta tarde, ás 19.30 horas, no pinar da praia co concerto de Pakolas, autor e compositor, que formou parte de grupos infantís como Mamá Cabra ou Gramola Gominola e que agora presenta un traballo en solitario con música pensada tamén nos máis cativos.
Os Xogos de Verán de Lourido, organizados pola asociación veciñal, cultural e deportiva de Lourido, en colaboración co Concello de Poio, celebraranse a próxima semana. Será entre o luns 24 e o sábado 29, días nas que desenvolverá a que será a súa edición número 27. A programación deste evento foi presentada este luns polo alcalde, Ángel Moldes, o concelleiro de Deportes, Cándido Muíños, e membros da asociación que organiza estes xogos. Entre o luns e o sábado, haberá competicións de fútbol 6 base, volei praia, petanca, carreiras populares, de caramelos e de bici-praia, tenis, chave e pesca.
Este luns arrancan o Raxó Verán e Campa Verán do Concello de Poio para facilitar a conciliación das familias que residen ou traballan no municipio. Este ano aumentáronse as prazas e igualáronse os horarios dos dous campamentos, de xeito que se garante atención entre as 07.30 e as 15.00 horas. Este ano o Concello de Poio recibiu 304 solicitudes. O Campa Verán desenvólvese os meses de xullo e agosto no CEIP Isidora Riestra, e conta con 150 nenos por quenda de quince días, mentres que o Raxó Verán organízase no CEIP Espedregada e nel participan un total de 45 nenos por cada quenda de quince días.
Vilariño será o lugar que acolla o acto institucional co que o Concello de Poio quere conmemorar o Día de Galicia. Será o martes 25 de xullo, ás oito da tarde. "Este 25 de xullo imos celebrar xuntos o que nos une a todos: o orgullo de ser galegos de Poio", destacou o alcalde, Ángel Moldes, que explicou que esta festa cambiará de ubicación cada ano para poñer en valor os lugares do municipio "que simbolizan a esencia galega". No caso de Vilariño, segundo expresou Moldes, "é unha xoia do noso patrimonio material e humano que xunta tradición e futuro, familias arraigadas desde séculos e veciños que veñen e fan novas achegas: un lugar plural e diverso pero cunha historia e un proxecto compartido".
O Concello de Poio inicia o operativo especial de limpeza de praias con dúas brigadas municipais. Ademais, este ano recupéranse a colocación de papeleiras de recollida de plástico e orgánico nas saídas das praias, así como as duchas e os lavapés, co obxectivo de mellorar e ampliar a calidade dos servizos que se ofrecen. Así, comeza a limpeza de praias con maquinaria específica en todos aqueles areais nos que sexa posible o acceso ou nos que o permita as mareas. Durante esta semana, os operarios ocupáronse de acondicionar e desbrozar os accesos e as escaleiras, e os socorristas xa están instalados en Siorto e Cabeceira.
Poio está en continua transformación e crecemento. O noso municipio medra e o Concello de Poio, que sempre apostou e segue apostando pola posta en valor da nosa historia e das nosas tradicións, modernízase para adaptarse ós novos tempos e optimizar os nosos recursos. Poio é xa un lugar de referencia consolidado na xeografía mundial, e agora, grazas ás novas tecnoloxías, temos tamén o noso sitio neste espazo virtual, universal e participativo que é a Rede. Estamos agora máis cerca de todos, dos que vivimos aquí e dos que se atopan lonxe.