fbpx

Poio xa respira aroma a San Xoán. A Praza do Mosteiro acolleu este mércores o inicio das festas patronais, que por fin retoman o seu formato habitual logo de dous anos de restricións, e no que un dos grandes protagonistas foi o director e actor Quico Cadaval, quen co seu humor deleitou ás numerosas persoas que acudiron á cita facendo unha serie de mencións cómplices á tradición desta festa, así como ao Mosteiro, ás sardiñas asadas ou á Illa de Tambo. “Para exorcizar tantos males que nos veñen por terra, mar e ar, no vento e no tren, diminuto coma un virus ou xigante coma un exército, o Concello de Poio convoca a unhas festas de San Xoán que van ser o comezo dunha nova era”, asegurou o pregoeiro.

PROGRAMA SAN XOÁN 2022 [PDF]

O alcalde de Poio, Luciano Sobral, e a concelleira de Cultura, Raquel Rodríguez, participaron este martes no acto de inauguración da mostra que, un ano máis, ofrecerá o pintor da Cañiza Diego de Giráldez no Mosteiro de San Xoán. Con esta son xa 38 as veces nas que o emblemático templo acolle a exposición dun artista que, tal e como sinalou o máximo representante do Concello, “considerámolo un veciño máis de Poio, ademais dun gran referente do mundo da arte a todos os niveis”. Cómpre lembrar que De Giráldez é o impulsor do movemento ‘NAS’ (Naturalismo, Abstracción e Surrealismo) e na súa traxectoria destacan as coleccións levadas a máis de 150 museos repartidos por todo o mundo.

A concelleira de Mocidade, a socialista Rosa Fernández, confirma que as ‘Andainas de Primavera’, rematadas neste mes de xuño, terán continuidade unha vez finalizado o verán. Será entón cando o departamento municipal impulse as ‘Andainas de Outono’, dando así resposta á demanda e ao interese suscitado por esta iniciativa, pensada para fomentar hábitos saudables, ao  tempo que se lle ofrece á veciñanza a posibilidade de coñecer lugares de interese polo seu valor paisaxístico ou patrimonial dentro da provincia de Pontevedra.

A tenente de alcalde e concelleira de Igualdade, Silvia Díaz (Avante Poio), deu a coñecer este martes os detalles da campaña Festas de Poio Seguras, que impulsará este departamento municipal durante a celebración dos festexos patronais de San Xoán e do Festival Armadiña Rock en Combarro. A través desta iniciativa habilitaranse ‘Puntos lila’, nos que seis promotoras de igualdade desenvolverán un traballo de concienciación e sensibilización sobre o respecto e a igualdade entre xéneros, así como na prevención das agresións machistas.

DESCARGAR DECALOGO [PDF]

O Concello de Poio reforzará a dotación de contedores do lixo nas proximidades aos acesos das praias habilitadas para o baño ao longo de toda a franxa costeira do municipio, facendo especial énfase nas que reciben a un maior número de bañistas ao longo do verán. Así o confirmou na mañá deste luns o concelleiro de Obras e Servizos Municipais, o socialista Julio Casás, que explicou que esta medida virá acompañada da retirada das papeleiras e recipientes situados nos propios areais. O edil do Goberno local garante que “as persoas que gocen das nosas praias durante a tempada estival contarán con puntos suficientes para depositar os restos”, se ben fixo fincapé na necesidade de concienciar tanto á veciñanza como aos e ás visitantes da importancia de que estes residuos non se deixen nos areais.