fbpx

A concelleira de Deportes, a nacionalista Marga Caldas, deu a coñecer a listaxe dos e das gañadoras dos Premios ao Deporte San Xoán, que nesta edición, de xeito excepcional, recoñecen a traxectoria dos deportistas máis destacados tanto da presente tempada como da 2020-2021, toda vez que o ano pasado esta cita non puido desenvolverse por mor da pandemia da COVID-19. A entrega será, como manda a tradición, o vindeiro 22 de xuño, coincidindo co inicio do programa das festas patronais.

O Concello de Poio informa de que este venres ábrese o prazo de presentación de solicitudes para a contratación de persoal para que o municipio conte durante os meses de verán cunha brigada de incendios. O período permanecerá operativo durante cinco días hábiles, segundo informa o titular de Persoal, Xosé Luís Martínez. A documentación poderase presentar a través da Sede Electrónica ou no Rexistro Xeral, se ben neste último caso será imprescindible solicitar cita previa. Ademais, na propia Sede Electrónica as persoas interesadas poderán consultar as bases e os requisitos necesarios para optar a esta convocatoria. As probas selectivas levaranse a cabo a través de concurso-oposición libre.



A pasada semana remataba o curso de recepcionista de aloxamentos turísticos, a cuarta proposta formativa impulsada nos últimos meses pola Concellería de Promoción Económica. O seu responsable, Gregorio Agís (PSdeG-PSOE), informa de que preto de 90 persoas inscribíronse nas catro formacións que se desenvolveron no Centro da Reiboa, na parroquia de San Xoán. Ao anteriormente mencionado hai que sumarlle o de loxística e distribución de carretilla elevadora, o de limpeza hospitalaria e o de expendedor de combustible. “En realidade, para finalice o programa superaremos os 100 inscritos e inscritas, toda vez que xa non quedan prazas para a sesión sobre caixa e reposición coa que remataremos o ciclo no outono”, explica o concelleiro do Goberno municipal. Este curso, que dará comezo o 19 de setembro e finalizará o 10 de outubro, xa completou o 100% das prazas ofertadas.



A Casa Museo de Colón recibiu este martes a visita de máis de 50 alumnos e alumnas do IES Ribeira do Louro, do concello do Porriño. Os e as estudantes, de idades comprendidas entre 13 e 16 anos, estiveron acompañados por catro mestres e mestras do centro educativo e tiveron ocasión de coñecer de primeira man as dependencias situadas no lugar de Portosanto, na parroquia de San Salvador. A expedición contou tamén co acompañamento do presidente da Asociación Galicia Histórica, Pedro Martín, e do escritor Ángel Carracelas, autor do libro La huella de Pedro Madruga en Cristóbal Colón.



Logo da súa última celebración no ano 2019, o Mosteiro de Poio, na parroquia de San Xoán, volverá acoller esta fin de semana unha nova edición do Certamen de Corais, unha cita emblemática que chega aos 23 anos de existencia e que está organizada pola Coral de Poio, en colaboración co Concello e coa Deputación de Pontevedra, a través do programa Pontegal, así como coa propia Parroquia de San Xoán.