fbpx

O alcalde de Poio, Luciano Sobral, participou este venres no acto para anunciar aos gañadores e gañadoras da primeira edición do Mini Print Internacional Galicia, no que colabora activamente o Concello e que está adicado ao Premio Nobel da Paz e Fillo Adoptivo do municipio Adolfo Pérez Esquivel, impulsor do emblemático Parque da Memoria da Seca (San Xoán). O rexedor, que estivo acompañado por membros da organización e do xurado, valorou moi positivamente o grao de participación nesta primeira convocatoria do certame, con máis de 224 obras recepcionadas desde diferentes países, e lembrou que desde hoxe mesmo, e ata o 12 de xuño, se pode visitar no Casal de Ferreirós a exposición composta por estas propostas artísticas. O horario de apertura ao público é de 10.00 a 14.00 horas, de luns a venres.

Xa comezaron os traballos de mellora e renovación do parque infantil do Paseo das Redeiras, nas proximidades do porto de Combarro. Así o confirmou a edil de Seguridade Cidadá, Marga Caldas (BNG), que lembrou que a intención inicial do Concello era trasladar este espazo de lecer a un lugar máis próximo ao núcleo e á Praza da Chousa, de xeito que no emprazamento do parque se habilitarían prazas de estacionamento. Sen embargo, Portos de Galicia, que á Administración titular da zona portuaria, ambas posibilidades. “Se a postura de Portos é afogar Combarro, a nosa obriga é dotar á veciñanza de servizos”, recalcou Caldas Moreira.

O Concello de Poio deu a coñecer á gañadora dunha nova edición do Concurso de Carteis de San Xoán, que pasará a ser a imaxe oficial das emblemáticas festas patronais, que comezarán o vindeiro 22 de xuño. A autora do deseño elixido polo xurado é Carolina Cancela Corbacho, alumna do IES e veciña da parroquia de San Xoán. Ao igual que en edicións previas, o certame dividíase en catro categorías distintas, repartidas en función das idades dos e das participantes, que deben plasmar no papel debuxos e deseños vencellados á tradición de San Xoán.

A Concellería de Igualdade vén de obter unha subvención de máis de 16.000 euros para a mellora de equipamentos do departamento. Tal e como informa a tenente de alcalde e responsable da área, Silvia Díaz (Avante Poio), son concretamente 16.640 euros os que o Concello de Poio solicitou con éxito á Secretaría Xeral de Igualdade, dependente da Xunta de Galicia. Esta liña de axudas realízanse ao abeiro do Decreto 130/2016, no marco do Pacto de Estado Contra a Violencia de Xénero. Este investimento destínase á dotación de mobiliario e novos soportes informáticos para o Centro de Información á Muller (CIM).

A concelleira de Cultura e Normalización Lingüística, a nacionalista Raquel Rodríguez, deu a coñecer este mércores os detalles da programación que o Concello, a través deste departamento, impulsa con motivo da celebración do Día das Letras Galegas, que neste 2023 recorda a figura do escritor, ensaísta e activista político Francisco Fernández del Riego. Trátase dun amplo programa, deseñado en colaboración coa Sociedade Cultural e Deportiva (SCD) Raxó, que se estreará xa este venres cun espectáculo de monicreques e finalizará o propio 17 de maio, día grande da conmemoración, cun faladoiro a cargo das xornalistas Belén López e Sara Vila.