O Concello de Poio, a través da Concellería de Igualdade, incrementa o número de prazas do Espazo Concilia, unha proposta socioeducativa de lecer e de apoio á infancia, que se promove co obxectivo de favorecer a conciliación da vida laboral e familiar, ao tempo que se fomenta a corresponsabilidade e se traballa na potenciación de valores como a igualdade e a prevención da violencia, a través de diferentes obradoiros e actividades. Este servizo estará operativo durante o verán no CEIP Viñas, na parroquia de San Salvador, desde o 3 de xullo ata o 8 de setembro, cun horario de luns a venres que tamén se incrementa, sendo de 7.30 a 15.00 horas.
O alcalde de Poio, Luciano Sobral, procedeu este mércores a realizar o izado dos dous Sendeiros Azuis cos que neste 2023 contará o concello de Poio, feito que se produce por primeira vez. Cómpre lembrar que este distintivo de calidade outórgao a Asociación de Educación Ambiental y del Consumidor (Adeac) e serve para recoñecer os recursos ambientais, naturais e lúdicos que presentan espazos ao aire libre como paseos ou sendas. Ao acadado por primeira en 2022 para o sendeiro litoral que vai desde A Seca e Lourido, nesta ocasión tamén o tramo da Variante Espiritual do Camiño Portugués, que na súa primeira etapa pasa por parte do termo municipal poiense, ata chegar ao Mosteiro da Armenteira, situado en Meis, partido desde o lugar de Fragamoreira, no límite con Pontevedra.
A Xunta de Goberno Local vén de aprobar esta martes as bases da convocatoria correspondente a unha nova edición das ludotecas de Campa Verán e Raxó Verán, organizadas pola Concellería de Educación. Este é un servizo que o Concello de Poio activa cada ano na temporada estival para facilitar a conciliación laboral e familiar da cidadanía, de xeito que se ofrece unha alternativa de lecer para nenas e nenos nados entre os anos 2011 e 2019. Tal e como consta na documentación, o período de inscrición abrirase o vindeiro 10 de maio e rematará o martes 23, ambos inclusives. As solicitudes tramitaranse preferentemente a través da Sede Electrónica do Concello ou no Rexistro Municipal. A selección de participantes farase por rigorosa orde de inscrición ata cubrir todas as prazas ofertadas. DESCARGAR BASES
O alcalde de Poio, Luciano Sobral, acompañado por membros do Goberno municipal, fixo entrega este martes dun obsequio conmemorativo a tres traballadoras do Concello, vencelladas á área de Servizos Sociais, que inician a súa xubilación. O acto tivo lugar no Palacete de Besada e tamén contou coa asistencia de traballadores e traballadoras municipais, que non quixeron perderse unha homenaxe “máis que merecida pola implicación e o servizo prestado durante décadas á nosa veciñanza”, tal e como indicou o rexedor. Gloria Helena Martínez Epifanio, María Alicia Veiga González e María Dolores Ferreira Suárez poñen punto e final á súa traxectoria na Administración local, da que formaron parte durante boa parte da súa vida.
A Xunta de Goberno Local vén de aprobar a adxudicación para a execución dos traballos de urbanización que o Concello de Poio desenvolverá na contorna de Anafáns, nas proximidades do Centro de Saúde (San Salvador). Trátase dunha actuación que contará cun orzamento superior aos 200.000 euros, que se financian a través do Plan Concellos da Deputación de Pontevedra.O proxecto, deseñado pola Concellería de Promoción Económica e Urbanismo, espertou o interese de varias empresas. Ata seis foron as firmas que se presentaron ao concurso de licitación.
Poio está en continua transformación e crecemento. O noso municipio medra e o Concello de Poio, que sempre apostou e segue apostando pola posta en valor da nosa historia e das nosas tradicións, modernízase para adaptarse ós novos tempos e optimizar os nosos recursos. Poio é xa un lugar de referencia consolidado na xeografía mundial, e agora, grazas ás novas tecnoloxías, temos tamén o noso sitio neste espazo virtual, universal e participativo que é a Rede. Estamos agora máis cerca de todos, dos que vivimos aquí e dos que se atopan lonxe.