fbpx

A concelleira de Deportes, Marga Caldas (BNG), visitou este xoves as instalacións do pavillón polideportivo da Seca, na parroquia de San Xoán, onde nas vindeiras semanas comezará unha actuación para dotar á pista dunha nova superficie homologada. Unha obra que “servirá para acabar coas deficiencias detectadas, de xeito que a infraestrutura pase a contar cunha superficie de primeira calidade”, segundo manifestou a propia titular da área.

O Pleno da Corporación aprobou na súa sesión ordinaria de outubro unha modificación de crédito que permitirá incrementar o orzamento para o proxecto ‘Poio Crea’, a través do cal a Concellería de Promoción Económica e Urbanismo impulsará un espazo para potenciar e impulsar o emprendemento local no Centro de Formación da Reiboa. O concelleiro responsable deste departamento, Gregorio Agís (PSdeG-PSOE), explicou durante o debate deste punto a necesidade de acometer esta tramitación, logo de que o concurso de adxudicación quedase deserto.

O alcalde de Poio, Luciano Sobral, participou este martes na Xunta Local de Seguridade, na que asinou a adhesión do Concello de Poio a ‘Vioxen’, o Programa de Seguimento Integral das Vítimas de Violencia de Xénero. O rexedor local estivo acompañado pola subdelegada do Goberno en Pontevedra, Maica Larriba; a concelleira de Seguridade Cidadá, Marga Caldas (BNG); a titular de Igualdade, Silvia Díaz (Avante), e dirixentes da Garda Civil e da Policía Local de Poio.

Preto de 80 horas de formación gratuíta, repartidas nunha ducia de ciclos, engloban a oferta que a Aula Cemit de Poio, situada na Escola do Campo de Combarro, terá a disposición da cidadanía desde o vindeiro luns, 31 de outubro, ata principios de decembro. Ademais, tal e como é habitual, a maiores destes cursos tamén se poderá utilizar a Aula Aberta, de luns a venres, de 19.30 a 21.00 horas. A aula está a disposición para as asociacións e organizacións do Concello, podendo facer uso dela previa solicitude.

O Pleno da Corporación municipal aprobou na súa sesión ordinaria do mes de outubro, celebrada este martes, a adxudicación do Servizo de Axuda no Fogar (SAF). Tal e como explica a concelleira responsable de Servizos Sociais, a socialista Rosa Fernández, o novo contrato terá unha duración de dous anos, coa posibilidade de dúas prórrogas anuais. O orzamento total ascende a máis de 3 millóns de euros.