fbpx

O Centro Cultural Xaime Illa de Raxó acolleu este venres o acto de presentación dos deportistas e da nova tempada do GD Supermercados Froiz, un dos clubs de referencia do municipio. O evento serviu para dar a coñecer aos integrantes dos equipos que competirán ao longo deste curso, que xa é o número 34 desde o nacemento da entidade. Como non podía ser doutro xeito, a cita tamén serviu para lembrar e render homenaxe a Magín Froiz, fundador do club e de Supermercados Froiz e falecido o pasado mes de marzo aos 78 anos.

A concelleira de Seguridade Cidadá, a nacionalista Marga Caldas, salienta o bo funcionamento do operativo deseñado en Combarro polo departamento municipal, con motivo das datas festivas de Semana Santa, e que incluía a dotación de prazas de estacionamento para residentes do centro nas rúas Maceira e Baixada á Chousa. Segundo constata a edil do Goberno local, a cidadanía deu cumprimento a esta medida “de xeito exemplar”, como reflicte o feito de que non fose preciso tramitar ningunha sanción polo uso indebido destes 30 aparcadoiros, que tiñan unha duración máxima de 24 horas para garantir o seu carácter rotatorio e acadar un maior aproveitamento.

O Concello de Poio vén de levar a cabo a reparación e posta a punto do lavadoiro situado nas proximidades do parque infantil de Saíñas, na parroquia de San Salvador. A actuación foi necesaria para poder arranxar os danos provocados por actos vandálicos. Os operarios municipais procederon a poñer a punto a cuberta da infraestrutura, que presentaba algunhas tellas rotas. Ademais, tamén se levou a cabo a limpeza e retirada de grafitis e pintadas nas pedras.



O Concello de Poio anuncia que o vindeiro 2 de maio abrirase o prazo para a presentación de solicitudes para a obtención de prazas das ludotecas de verán. En concreto, trátanse do Campa Verán e Raxó Verán, impulsados pola Concellería de Educación, e do Espazo Concilia, xestionado polo departamento de Igualdade. En ambos casos, o período permanecerá aberto ata o venres 13 de maio (inclusive). As xestións poden realizarse de xeito telemático a través da Sede Electrónica do Concello. No caso de optar pola vía presencial no Rexistro Municipal, será preciso solicitar cita previa.

O contacontos O Paroleiro, a cargo de Pablísimo, chegará este venres 22 de abril á Biblioteca Municipal de Campelo. Esta iniciativa, que dará comezo ás 17.00 horas, forma parte do ciclo ‘Entre Libros Anda o Conto’, impulsado pola Concellería de Cultura e Educación. A edil responsable deste departamento, a nacionalista Raquel Rodríguez, explica que a través deste tipo de iniciativas búscase fomentar a lectura entre as crianzas, consolidándoa como unha fórmula de lecer para cativos e cativas. Precisamente, este tipo de citas desenvólvese co gallo da celebración do Día Internacional do Libro, que será o vindeiro 23 de abril.