fbpx



O 50 aniversario do nomeamento de Combarro como Conxunto Histórico e Artístico será protagonista na décima quinta edición do Culturgal, que terá lugar esta fin de semana en Pontevedra. A concelleira de Cultura, Raquel Rodríguez (BNG), acudirá a esta cita acompañada por integrantes da Asociación Cultural A Solaina, para presentar unha das partes do vídeo ‘Lembranzas: Memoria viva da historia de Combarro’, que foi proxectado, cunha gran acollida, durante os actos institucionais celebrados hai uns días para conmemorar a histórica data.

VER DOCUMENTAL

O Concello de Poio, a través da Concellería de Servizos Municipais, continúa a traballar de cara a adaptar as ordenanzas de servizos e fiscais locais no que se refire ao tratamento e xestión de residuos, de cara a dar cumprimento aos obxectivos que constan na normativa autonómica, así como na estatal e na europea. O concelleiro responsable do departamento, Julio Casás (PSdeG-PSOE), lembra que a Administración local procedeu á elaboración dun estudo técnico sobre xestión e prevención de residuos municipais para acadar esas metas. Para iso, contratouse á empresa especializada Enxamio Ingeniería Industrial, que nos vindeiros días dará a coñecer os resultados e as conclusións do devandito estudo.

O Concello de Poio investirá preto de 75.000 euros (concretamente, 73.640 euros, IVE engadido) nun proxecto para levar a cabo melloras de accesibilidade na Biblioteca Municipal, situada en Campelo. Así o confirmou a concelleira de Cultura e Educación, a nacionalista Raquel Rodríguez, que salienta a importancia destas obras. O expediente xa foi aprobado pola Xunta de Goberno Local e conta con todos os permisos pertinentes. “Actualmente a tramitación atópase na fase de presentación de ofertas para as empresas interesadas en acometer os traballos”, sinala a edil do Goberno local. Unha vez remate este prazo, o vindeiro 9 de decembro, procederase a completar o proceso de licitación e realizar a pertinente adxudicación. O prazo de execución das tarefas é de catro meses. “Confiamos en que a adxudicataria xa poida empezar a traballar de cara a comezos do vindeiro ano”, sinala Rodríguez Alonso.

A tenente de alcalde e concelleira de Igualdade, Silvia Díaz (Avante Poio), visitou esta mañá, acompañada pola directora do Centro de Información á Muller (CIM), Raquel Morales, o IES de Poio, onde nestas datas se están a desenvolver unha serie de obradoiros que forman parte da programación ‘Poio planta cara á violencia’, organizada polo departamento municipal con motivo do 25-N, Día  Internacional da Eliminación da Violencia contra a Muller. Tal e como lembrou a propia Díaz, un dos piares do programa céntrase na mocidade, a través de actividades e sesións que se prolongarán, nalgúns casos, ata principios do vindeiro ano e que afondan nos valores relacionados coa igualdade entre homes e mulleres e a detección e supresión de condutas machistas, entre outros.

 

O programa ‘Cóllelle o gusto’, organizado pola Concellería de Benestar Social e Mocidade, concluirá o vindeiro mes de decembro cunha última actividade. Logo dos talleres sobre iniciación á cestería, que tivo lugar a finais de outubro, e de deseño de tapices, desenvolto o pasado venres 18 de novembro, o ciclo pecharase cunha sesión sobre ‘babyshoes’, que consiste na elaboración de calzado para bebés. A concelleira responsable deste departamento, a socialista Rosa Fernández, explica que aínda hai prazas dispoñibles e que a cita será o venres día 2, na Casa Rosada, en horario de 17.00 a 21.00 horas. A inscrición é gratuíta, con materiais incluídos, e pode realizarse en persoa ou chamando ao 986872401, ademais de enviando un correo electrónico a Este enderezo de correo está a ser protexido dos robots de correo lixo. Precisa activar o JavaScript para velo..