A concelleira de Deportes, a nacionalista Marga Caldas, visitou hoxe as instalacións do pavillón polideportivo da Seca, na parroquia de San Xoán, no que veñen de finalizar os traballos de renovación e mellora da pista, ademais da realización doutras tarefas, a través dun proxecto cun orzamento superior aos 200.000 euros. A edil do Goberno local confirmou que a infraestrutura recuperará a súa actividade habitual nos vindeiros días, volvendo a acoller adestramentos e partidos de competición. Precisamente, está previsto que este sábado o pavillón xa acolla o encontro de Liga do Poio Pescamar, realizándose un pequeno acto previo de inauguración.
A Mesa En Defensa dos Dereitos Sanitarios de Poio, na que están representados todos os grupos da Corporación municipal e o tecido asociativo do municipio, celebrará este xoves, 23 de marzo (20.00 horas), unha nova sesión, na que entre os temas a tratar figura unha proposta para que o Concello reafirme o seu apoio a todas as familias do municipio con persoas afectadas por parálise cerebral.
A dez días de finalizar o primeiro trimestre de 2023 o servizo de recollida de voluminosos, unha prestación gratuíta da que se poden beneficiar a veciñanza de Poio para desprenderse de diferentes restos de gran tamaño, está a traballar a pleno rendemento. Segundo un informe elaborado pola empresa responsable do tratamento e retirada de residuos no concello, Valoriza, ata o pasado 15 de marzo xa se tiñan retiradas un total de 29,66 toneladas de restos. O 50% desta cantidade corresponde a mobles antigos, destacando tamén as cantidades de chatarra (case 9 toneladas). Os colchóns, electrodomésticos e restos sanitarios completan o listado.
O último bloque da programación desañada con motivo do Día Internacional da Muller, celebrado o pasado 8 de marzo, xa está en marcha. A tenente de alcalde e responsable da área de Igualdade, Silvia Díaz (Avante Poio), acompañada pola psicóloga do CIM, Lidia Fazanes, participou este martes no primeiro dos contacontos do ciclo ‘Vivencias de Muller’, unha iniciativa a través da cal o alumnado dos CEIP do municipio teñen a oportunidade de coñecer de primeira man as experiencias vitais das cinco veciñas de Poio que neste 2023 foron homenaxeadas por seren “un exemplo de vida e heroínas durante os 365 días do ano”, tal e como recalca a propia Díaz.
O concelleiro de Festexos, o nacionalista Xosé Luís Martínez, vén de anunciar o cartel completo do Festival Sons de Ánkar, que chega á súa cuarta edición e que este ano presenta varias novidades no que ao seu formato e datas de celebración se refire. Tal e como xa se adiantou hai uns meses, a cita será o vindeiro 29 de abril no parque de Ánkar, en San Salvador, con entrada de balde. Ademais das Tanxugueiras, xa anunciadas no seu día, tamén actuarán en Poio outros dous grandes referentes da música do país, como son Xabier Díaz e As Adufeiras de Salitre e Treixadura. Os concertos darán comezo a partires das 19.00 horas.
PROMOCION ECONOMICA
Poio está en continua transformación e crecemento. O noso municipio medra e o Concello de Poio, que sempre apostou e segue apostando pola posta en valor da nosa historia e das nosas tradicións, modernízase para adaptarse ós novos tempos e optimizar os nosos recursos. Poio é xa un lugar de referencia consolidado na xeografía mundial, e agora, grazas ás novas tecnoloxías, temos tamén o noso sitio neste espazo virtual, universal e participativo que é a Rede. Estamos agora máis cerca de todos, dos que vivimos aquí e dos que se atopan lonxe.